Қызылорда облысы медицина қызметкерлерінің сайты

ШЫМКЕНТ. ҚазАқпарат - Оңтүстік Қазақстан облысының әкімі Жансейіт Түймебаев Түркістанда туберкулезді жаппай жұқтыру оқиғасына қатысты басқарма басшысына қатаң сөгіс жариялауды тапсырды. Бұл туралы аймақ басшысы аудан, қала әкімдерімен және облыстық басқармалар басшыларының қатысуымен өткен селекторлық мәжілісте мәлімдеді, деп хабарлайды ҚазАқпарат ХАА тілшісі.

Жиында облыс басшысы Түркістандағы арнайы әлеуметтік қызмет көрсету орталығындағы оқиғаға байланысты тиісті сала басшыларының атқарып жатқан жұмыстарын да тыңдады. «Бұл жағдай әлеуметтік мекемеде орын алды. Сондықтан Жұмыспен қамтуды үйлестіру және әлеуметтік бағдарламалар басқармасының басшысы Әсия Темірбаеваға қатаң сөгіс жариялансын. Тексеру нәтижесінің қорытындысына орай тағы да шара қолданатын боламыз», -деді Жансейіт Түймебаев.

Жұқпалы аурудан үш науқастың көз жұмуы өте қайғылы оқиға екендігіне тоқталған өңір басшысы, кемшіліктерге жол берген қызметкерлерге қатысты тексеру тағайындалғанын жеткізді. Құқық қорғау органдары да оқиғаға орай тергеп-тексеру жұмыстарын бастаған. Әзірге бұл жағдайға байланысты аталған мекеме басшылығы жұмыстан босатылды. Еске салайық, Түркістандағы психоневрологиялық диспансерден өкпе құрт ауырына шалдыққандар саны 65 адамға жетті. Науқастардың 24-і дерттің ашық түрімен ауыратыны анықталған еді. Үш науқас сырқатынан айықпай, қайтыс болды.

Автор: Айнұр АҚБАЕВА

Дереккөз: http://www.inform.kz/kz/tuymebaev-tuberkulezdin-zhappay-taraluyna-zhol-bergen-baskarma-basshysyna-katan-sogis-zhariyalady_a3003529